“PC” тоглоомонд донтох хүүхдийн тоо жилээс жилд өсч, хар тамхи шиг хурдан тарж байна. Толгойтой бүхэн тоглоомын газар байгуулж, хонгил бүхнийг эзэгнэж байсан үе бий. Одоо ч гэсэн энэ байдал тийм ч сайжраагүй л байна. Хэдийгээр ийм төрлийн тоглоомын газруудыг журамлаж, тодорхой цаг, нас зааж өгсөн боловч эзэд нь "хүүхдүүдийг хордуулж, донтуулах нь бидний эрх, зах зээлийн хууль, бидний бизнесийг боолоо, хаалаа" гээд Чингисийнхээ талбай дээр очоод хэвтчихэж байсан нь саяхан. Гэтэл өчнөөн зүйл амлаж байж тогтоол шийдвэрд өөрчлөлт оруулуулсан нөхдүүд ёстой хуулийг гууль болгосон хэвээр байна. 

Бага насны хүүхдийг хонон өнжин тоглуулдаг, гаднаас нь цоожилж явдаг байдал одоо хүртэл байсаар. Тэр ч бүү хэл “PC” тоглоомын газар янз бүрийн хэрэг гарах нь буурахгүй байна гэж хууль тогтоох байгууллагын ажилтан мэдэгдэв. Нийгмийг хамгийн их цочроож буй хэрэг бол тоглоомонд донтсоноор эрүүл мэнд, амь насаараа хохирох. Тоглоомоос үүдэлтэй хэрэг зөрчлийн дуудлага цагдаагийн газар тасралтгүй ирсээр байна.

Тоглоомонд донтож, эрүүл солиотой нь мэдэгдэхгүй, дэмийрч гөлөрсөн, сульдаж ядарч хар хөлс нь цувсан хүүхэд залуучууд мэдрэлийн ядаргаа гэсэн оноштойгоор эмнэлгүүдийн үүд сахиж, ээж аав нь аргаа барж явна.

Сүүлийн үед утастай л бол түүн дээрээ тоглоом татаж аваад түүнийгээ тоглоод ухаангүй болсон хүүхдүүд гудамжаар нэг явах болж. Ингэж яваад машин дор орчих вий дээ гэж сэтгэл зовнин араас нь дагаад алхамаар хүүхдүүд ч тааралдах л юм. Энэ дэлхий нийтийг түгшээж байгаа тахал гэж хэлэхэд ч багадна. Өчигдөрхөн санагдана, нэгэн сонин дээрээс Япон улсад оройн 21 цагаас хойш хүүхдийн гар утсыг унтраасан байх тухай хуулийн төсөл хэлэлцэгдэх гэж байна гэж. Мөн аргаа барсан явдал шүү. Тэр байтугай Турк гээд нэлээн хэдэн оронд бүх нийтээрээ донтоод, ажлын бүтээмжинд нөлөөлөөд байгаа нийгмийн сүлжээ гэж нэрлэгдэх болсон твиттер, фейсбүүк зэргийг хаасан, хаах гэж байгаа тухай яригдаж бичигдэж байна. Манайд ажлын цагаар нийгмийн сүлжээгээр сонин хачин юм тараагаад, хов жив, хэрүүл тэмцэл хийгээд суух нөхдүүд олон болжээ.

Саяхан олон улсын бас нэг сонирхолтой судалгаа харсан юм. Ямар орон ямар сайт түлхүү хэрэглэдэг талаар. Тэр судалгаанаас харвал хөгжилтэй гэгдэх орнууд танин мэдэхүйн мэдээлэл түлхүү авдаг google.com, оросууд гэхэд л өөрсдийн мэдээллийн гол хаяг yandex.ru руу байнга ордог гэсэн судалгаа байхад Зүүн Азийн орнууд, Африкийн хойд хэсэг гээд ядуу буурай тодотголтой орнуудын иргэд фейсбүүк хэрэглэдэг байх жишээтэй. Мэдээж, бидний хайрт Монгол орны иргэд фейсбүүк-аас өдөр шөнөгүй салж чаддагүй тул хаана орсоныг дээрхи зургаас та харж байна. 

За, буцаад интернет тоглоом руугаа оръё. Энэ асуудал ганцхан манай улсад тохиолдоод байна гэвэл эндүүрэл. Тухайлбал, Хятадын иргэн Чен Юй гэгч 23 настай эр бүтэн 23 цагийн турш интернэт клубт Warcraft тоглосны дараа газар дээрээ нас баржээ.

http://mongolcom.mn/read/5664